Околу 39% од Европејците повеќе би прифатиле консултации со вештачка интелигенција наместо со лекар, наведува ШТАДА во здравствениот извештај за 2025 година. Кај помладите генерации (18–45 години), таа бројка е уште поголема и изнесува 45%. Поддржувачите на вештачката интелигенција во здравството истакнуваат постојана достапност, брзи одговори и објективни повратни информации. Некои дури се чувствуваат посигурни кога ги споделуваат своите лични здравствени податоци со дигитален интерфејс отколку со човечко суштество.
Пристапноста/достапноста на AI системите 24/7 и обезбедувањето моментален одговор е главната причина за 57% од Србите, 56% од Унгарците, 55% од Чесите и 54% од Словаците.
Но, постои и претпазливост: повеќе од половина Европејци (52%) и понатаму се неодлучни. Главните мотиви за избегнување на консултации со вештачка интелигенција се недостигот на доверба, проследен со потребата за лична интеракција. Сепак, овој скептицизам можеби нема да трае засекогаш – дури четвртина од граѓаните кои се сомневаат во AI велат дека би можеле да го сменат мислењето доколку вештачката интелигенција стане понадежна. Недостигот на доверба во способноста на вештачката интелигенција да даде точни медицински совети е главен мотив за 61% од Ирците, 60% од Швеѓаните и Португалците, 59% од Казахстанците, 58% од Данците, но и за 49% од Србите.
Личната интеракција во медицинските/психолошките консултации е важна за 54% од Швеѓаните, 53% од Французите, 52% од Бугарите, како и за 44% од Србите. Загриженост дека нивните лични податоци ќе бидат складирани или споделени од страна на AI системите изразиле 25% од Ирците, 24% од Британците, по 22% од Французите и Германците, и само 8% од Србите.
Голема доверба во здравствените работници
Граѓаните на Европа во значителен број најголема доверба имаат во својот избран лекар/доктор по општа медицина, но и во останатите здравствени работници. Кога станува збор за доверба, луѓето и понатаму се на прво место. Лекарите по општа медицина се на врвот на листата (69%), веднаш зад нив се здравствените работници (61%) и фармацевтите (58%).
Потоа, нивото на доверба нагло опаѓа: само 24% од граѓаните имаат доверба во специјализирани здравствени билтени, 20% му веруваат на Гугл, а само 15% веруваат на вештачката интелигенција. Сепак, тоа е повеќе од довербата во масовните медиуми (12%) или здравствените инфлуенсери на социјалните мрежи (11%). На самото дно се политичарите, на кои им веруваат само 8% од Европејците.
Доверба во лекарите по општа медицина изразуваат 81% од Данците, 80% од Белгијците, 79% од Португалците, по 77% од Шпанците и Холанѓаните, но и 65% од Србите. Голема доверба во останатите здравствени работници е највидлива кај Шпанците (80%), Холанѓаните и Чесите (по 74%), додека најмногу доверба во научниците имаат граѓаните на Шпанија (73%) и Португалија (71%), Србија и Словачка (по 59%).
Ирците и Белгијците (по 69%) имаат доверба во фармацевтите, исто така и Холанѓаните (68%), а во помала мера и Србите (51%).
AI, односно вештачката интелигенција, најголема доверба добива кај Узбекистанците (30%) и Романците (20%), а во помала мера и кај граѓаните на Србија (15%).
Годинашното истражување покажува дека граѓаните постари од 55 години, како и оние со добро физичко здравје, значително повеќе им веруваат на своите избрани лекари. Наспроти нив, помладите генерации повеќе им веруваат на здравствените „инфлуенсери“ на социјалните мрежи, но и на вештачката интелигенција. И покрај тоа што вештачката интелигенција буди љубопитност и полека стекнува доверба, кога станува збор за здравјето, Европејците и понатаму ги ставаат луѓето на прво место – особено оние со медицинско образование.
Дознајте повеќе за тоа како Европејците размислуваат за вештачката интелигенција во здравството и многу повеќе во ШТАДА здравствениот извештај за 2025 година.
Извор: bizlife.rs
